السلام عليكم و رحمة الله و بركاته
اللهم لك الحمد حتي ترضي و لك الحمد اذا رضيت و لك الحمد بعد الرضي اللهم و لك الحمد علي كل حال
كيفكم اصدقائي الاعزاء ؟؟ اتمني الجميع بخير و عافيه
لى فتره طويله ما نزلت شي بالمدونه لأني انشغلت كثير
كان هذا الترم متعب جدا، اربع شهور كامله كلها واجبات و برزنتيشن و ابحااااااث
و الحمدلله خلصت يوم الخميس
طبعا فترة عمل الابحاث كانت اصعب فتره و كنت احس ان الايام تمشي ببطء
و عملت حاجه عشان تبقي ذكري و هي اني صورت توقيت اليوم اللي بدأت فيه اول بحث و توقيت تسليم اخر بحث
١ ابريل كان اول يوم
٦ مايو كان اخر يوم
سلمت ثلاثة ابحاث:
الاول كان بعنوان (العلاقه بين الام و ابنتها) تناولتها في روايتين
الثاني بعنوان ( كيف صور كتاب القرن العشرين شهرزاد)
و تناولت فيها قصة الف ليله و ليله الاصليه و رواية ليالي الف ليله لنجيب محفوظ
و رواية الطريق الي بغداد لكاتبه تركيه اسمها جونيلي
و رواية دنيا زاد لكاتب امريكي اسمه جون بارث
البحث الثالث و كان بعنوان (هل الصداقة ممكنه تحت سلطة الاستعمار)
و تناولتها في رواية طريق الي الهند للكاتب البريطاني فورستر
طبعا وقت الشغل كانت غرفتي مقربعه علي الآخر، مليانه اوراق و كتب
هذي صور لها و ان شاء الله ناويه عليها نية ترتيب قووووية ههههههه
الحمدلله الان ارتحت من الضغط
باقي لي الرساله بإذن الكريم و ربنا ييسرها
..........
طبعا لا انسي اهني الاتحاديين بالفوز، و هذي عادة العميد :)
..........
نزلت اليوم بعض الصور اللي صورتها:
هذي صورة الباص اللي اروح بيه للجامعه
هذي صوره لبحيره جنب البيت و صورتها بعد ما ذاب الثلج منها
قبل كم يوم نزل علينا مطر شديد و صباح اليوم الثاني نزل ثلج،
و اتجمدت قطرات المطر اللي علي الشباك
و صور الورد هذي لكم زواري الاعزاء عربون تقدير و احترام و ان شاء الله تعجبكم
